حسني همام

« الزمن الجميل »
===========
بنسمع كتير كتير
كلمة الزمن الجميل
وأول ما بنسمعها بنحس براحة
وسعادة بدون تفكير
ياترى ليه؟
علشان أي حاجة من الماضي
بيبقى ليها عندنا حنين
وبتفكرنا بذكريات حلوة كتير
وأيام عشناها لما كنا صغيرين
ومكنش عندنا مسئوليات
ولا شايلين هم كتير تقيل
ولا الموضوع غير كده خالص
وفعلا الزمن اتغير للأسوأ بكتير
ودايما نسمع كلمة اغاني الزمن الجميل
وأفلام ومسلسلات الزمن الجميل
وبرده مباريات الزمن الجميل
وناس الزمن الجميل
وأيام الزمن الجميل
وكأن أي شيء في الماضي كان جميل
ومكنش فيه أبدا
شئ وحش خالص كتير
لأ يا جماعة بعد اذنكم
اسمحوا لي
ده كل زمن بنعيشه
فيه الوحش وفيه الجميل
مع كل الاحترام والتقدير
للناس إللي امتعتنا
وأدخلت الفرحة لبيوتنا
في أوقات كتير
في الزمن إللي بنقول عليه جميل
ودلوقتي فيه عندنا
إمكانيات وتكنولوجيا
أكتر من زمان بكتير
وبرده عندنا حاجات وحشة
وحاجات تانية جميلة كتير
طب أقولكم بقى الحقيقة
ومحدش يزعل مني خالص
مش الزمن إللي اتغير
لأ ده الناس هي إللي اتغيرت
عن الأول تغيير حقيقي كبير
وظروف الحياة هي كمان اتغيرت
نتيجة الأحداث السريعة كتير
والناس بقت بتستسهل
كل حاجة
ومش عايزة تتعب
وتعمل مجهود كبير
وكمان مبقوش يختاروا صح
ويحطوا كل واحد في مكانه السليم
علشان نلاقي المبدع والفنان والمطرب
والممثل واللعيب التقيل
وبقت الواسطة والمحسوبية
ليهم دور كبير
في حاجات في حياتنا كتير
علشان كده إللي بيوصل
متستنوش منه الكتير
لأن مستواه متواضع
وعامل فيها كبير
مع إن فيه أحسن منه بكتير
عرفتوا بقى إن العيب مش في الزمن
وإن العيب فينا
بس إحنا بنجيبها في الزمن
عشان منبقاش إحنا الوحشين
ومع ذلك هييجوا إللي بعدنا
ويقولوا على زمننا
إنه كان زمن جميل

حسني همام