61 – المكان حزين
*************
بعد غياب زورت المكان مكان الذكريات مع كل الأحباب.
لقيت المكان حزين ودموعه في كل حته سألته ليه كده بقيت حزين ودموعك نزله سيل فين أيامك معانا وفين أيامنا معاك.
أوعه تقول زي الأغاني عاوز ترجع تاني هات من تاني اللي فات.
معاك كانت لينا أجمل وأحلي الذكريات.
ذكريات كتير للأحبة من اللي عايش منهم ومن اللي مات .
فاكر هنا في الركن ده أتولدت قصة حب جميلة بين بنت ولد .
هنا في الركن ده كنا بنحكي حكايات العرب.
هنا كنا بنحكي عن حب الوطن واللي متمسك بيه واللي هرب.
كنا هنا في نفس المكان اللي زعلان فينا كان بيتكلم ويصرخ وكنا بنتحمله من حبنا ليه حتى لو كان جواه بركان غضب.
هنا عاشق أهدي محبوبه أحلي الورود هنا كانت أجمل وأحلي وأوفي العهود هنا كان المكان من زمان مليان أغاني حب وطرب.
ممكن تقولي حزنك ده ليه يا تري علي اللي ماتوا وفارقوا الحياه ولا علي اللي فارقوا بعضهم من غير سبب.
ولا بتبكي علي علي الوفا قبل ما يكون الجفا وتزويق وتزييف الكلام
يا تري بتصرخ وحزين من الناس الكدابين اللي عيونهم قاسيه ودموعهم في عيونهم زي الحجر ما تعرفش في يوم معني النزول .
ممكن تجاوبني أنا بسألك مين اللي أتسبب في وقفة ضحكتك وصوت غناويك وقصايدك اللي لها العجب مين اللي خلاك لبست توب خيوطه مغزولة من ضلام الليل صرخ المكان وقالي كفايه كده عارفه مين اللي أتسبب في كده عارفه مين اللي خلاني حزين بعدك عني طول السنين هو اللي خلاني حزين .
