خالد المنصوري

سمعتي من غيري
سمعتى"حبيبي" من غيري ؟
طب استني .. كانت أحلى ؟
خلاص ونسيتي تأثيري
أكيد تأثيره كان أعلى
هقولك ايه طب احكيلي
وانا راح احاول استوعب
وبصي في عيني وقوليلي
وانا على حزني هتغلب
ماعدش طبيعي تسيبيني
وانا كده لسة مش فاهم
ولا مسموح تجاوبيني
برد بسيط كده وعايم
مش انتي زمان وعدتيني
مفيش اسرار كده مابينا
ولو عتم في يوم ليلي
هتبقا عنيكي قناديلنا
طب استني .. و دليني
عشان جوايا ألف سؤال
ولو غلطان .. ترديني
ما هو لازم لأنه محال
بأنك يوم تفارقيني
وأنا لسة كده بحاول
ألم جراحي في حنيني
عشان حبك ده يستاهل
ولو قولتي هتنسيني
أنا موافق .. عشان عارف
بأنك بكرة هتجيني
بشوق ملهوف..ومش خايف
لأن خلايا تكويني
نمت فيكي وساكناكي
وكل وريد بيرويني
فيه نهر بيسري جواكي
خالد المنصوري