م/عبد الحميد سالم

( نزلة برد ) م/عبد الحميد سالم
اسمع بقى ياعم من واحد
عامل فيها صغير
ولبست نص كم
فى شهر ديسمبر
وقال مين قدى دنا عنتر
مين اللى كبر يلله ؟
دنا يابنى لسة شباب
قام فجأة جه الشتا
والجو قام مطر
ودخل البرد عليه
من تحت عقب الباب.
وهات يا رشح .وعطس
والعضم بقى كله متكسر
*******
جريت على دولابى
وطلعت الشتوى والبطاطين
واللى يقول خد جرعة
وكام حقنة للتسكين
واللى يقول لمون وزنجبيل
وكل م البصل فحلين
كده كده هتنام بس يومين
ومعلهش يا مسكين
خد م الشغل أجازة
هوا الشغل هيروح فين
انا قلت حرام وتوبة اخفف
دا سنى فوق الخمسين
مهو اللى اتلسع م الشوربة
بينفخ ف الأيس كريم
وان طال بيا الأجل
راح اشتى ف سبتمبر