بقلمى المكلوم / حسن الليثى

.. تخيل يوم ..
تخيل لو تعيش مغلوب على أمرك
تشوف الفرحه قدامك .. بتندهلك
وحلمك جوه زنزانه .. بعيد عنك
وهمك حمل فوق راسك .. سبب غلبك
وشايف من بعيد أفراح .. تطير حواليك
تصب لناس .. كاسات الراح .. وحارمه إديك
وعمر عيونها ما تشوفك .. و جت ف عنيك
ويوم ورا يوم ..تنام وتقوم .. حزين مهموم
......................
ودنيا الناس قصاد عينك .. تغنيلهم
.. تداديهم .. تهاديهم .. وتديلهم
وتيجى الفرحه تسقيهم .. نعيم بالكوم
ولاتلقى نصيب فيها .. تبات محروم
وقلبك يسألك أمتى .. هتفرح يوم
وهيه الدنيا ليه تقسى .. على المحروم
تبات فى هموم وتحزن يوم .. على أمرك
تشوف الشهد ف أديهم .. تدوق مرك
تبات والدمعه تشعل نار .. على جمرك
ويوم ورا يوم .. تنام وتقوم .. حزين مهموم
....................
وتلقى السعد يوعدهم .. ويخلفلك
وييجى الحظ يوفيلهم .. ويحلفلك
ولا عمره صدق مره .. فى حلفانه
ولاتعرف طريق جره .. لعنوانه
وقلبك نفسه فى مسرة .. لأحزانه
وليه انسان .. سعيد نشوان .. وأخوه مكلوم
فى إيده زهور .. وكاس مليان .. وأخوه محروم
ويوم ورا يوم .. تنام وتقوم .. حزين مهموم
................
وليه السعد راح لكتير .. وليه سابك
وأمتى الحظ .. هايخبًط على بابك
يقولولك .. ماتزعلشى .. وقوم عافر
هتلقى السعد خدامك .. كتير وافر
وتيجى تقوم .. تلاقى اللوم .. كسر نابك
صدود وقيود .. وحب لدود .. فى طين جابك
وليه الذل .. جاى من ضل .. أحبابك
على دربك .. وهايدوسك ..متين حافر
وحلمك .. عدٌى يضحكلك .. وبيسافر
.................

تخيل يوم .. تبات مغلوب ..
على أمرك
تبات فى هموم .. سريرك طوب ..
وفيه جمرك
وتلقى الحيرة نادهه الليل ..
وساكنه اليوم
ويوم ورا يوم .. تبات وتقوم ..
حزين مهموم
تخيل يوم .. ؟!
.........................
فجر السبت _ ٢٠١٨/١٠/٢٠
بقلمى المكلوم / حسن الليثى