( محمد عنانى )

عشان تبنى الوطن
==========
إنت عشان تِبنى الوطن
مش بالحنين
ولا بالغُنَا وقت المِحَن
ولا بالأنين
ولا دموع الكدابين
ولا بالفِتَن
ولا بحكاوى السهرانين
إنت عشان تبنى الوطن
لازم يكون عنك أمل
وتحققه بصدق العمل
بالإدين الشقيانين
بعرق ولادنا الطيبين
الشغالين
مش ع القهاوى ملَطَعِين
ويشتكوا مُر السنين
إنت عشان تبنى الوطن
مش بالكلام
ولا حلم شُفنَاه ف المنام
يعنى ضرورى بالكفاح
والتعب يبقى معاه دايماً نجاح
والوطن يبقى عزيز بجهود ولاده
المخلصين الكادحين تِعلا راياته
=================
( محمد عنانى )