مبقتش بلدى
النهاردة كنت فى شغلى بس كنت قاعد قعدة بلدى
معايا زمايل بطعم الصحاب مع انهم مش من بلدى
اللى من قبلى واللى سواحلى واللى بلده جنب بلدى
فيهم كبير السن و كبير المقام واللى زيي و زى ولدى
اكلنا لقمة فطار على قد حالنا مغمسينها بعيش بلدى
كنا بنحلى ورديتنا وفطارنا بكلام له طعم اهل بلدى
قال الكبير دا أكل ودى أيام ولا ايه بالظبط يا ولدى
دنا و أنا وكلت زمان كذا ولحقت ياما كل خير بلدى
ايشى سمن و جبن وقشطه و خبيز فطير بفرن بلدى
والوز والبط والله والفراخ والخير كله كان من بلدى
ضحكت قولت انا كمان لحقت اللحمة والفراخ بلدى
اولادى ولا يعرفوا ولا حتى شافوا الكلام دا بالبلدى
يمكن فاتهم السمن والفراخ بس لسه البيض اهه بلدى
كنا نعدى فغيط مالريحة نعرف زارع ايه يا بلدى
البيت كان بلدى واللبس كان بلدى اه يانا يا وعدى
فاكر جدى مع أنه كان أفندى صورته بجلابية بلدى
اما النهاردة لا ريحة ولا طعم لخيار اولحمه بلدى
قام رد صاحب و قال سبنا السباخ كله كيماوى بيدى
صوب مزارع سمك و فراخ هرمونات و سموم بتدى
عشان الحاجة تزيد و توفى عددنا سرطان هنا معدى
خايف لبكرة النيل لو قل يهجنوه بمجارى و ادى
قالو زمان البيوت كنت تشم الكانون وانت معدى
تشم محشى أو معمر أو صوانى فى فرن بلدى
تعرف غداهم ستات تعمر و تربى فى بيتها لبلدى
كله صبح ربع مشكل تيك اواى و معاه السلطة بلدى
بنت بلدى بعد العولمة بقه بقت باربي بقت ليدى
خايف اقول حتى نسوان بلدنا بعد المدنية مبقتش بلدى
و ابن بلدى بعد ما نسي جلابيتو و طاقيتو واللاسه يا ولدى
لبس مسقط و حط جل بقى كابوريا و فنكى و سبايكى
سايب مع توبك معانى ولا تخلف ولا الجدعنة والطيبة يا ولدى
الله يرحم فريد كان يغنى لبلدى و بنت بلدى بالبلدى
كان فيه هويه فيه فكر و كان فيه كمان وطن عربى
النهارده حتى المسلسل بقى كورى و تركى و هندى
فاكر زمان الهجان و ارابيسك و الحلمية تاريخ بلدى
البلد لما بتخلص مفيش إعادة بالليل أو بكرة يا ولدى
والله زمان كان كل حاجة ليها معنى و طعم و ريحة
بصراحة بيوت زمان غير النهاردة يعنى كدا بالبلدى
نقدر نقول بوضوح هو فى بلدى صح مبقتش بلدى
أبو عبدالله إسلام خليفه
ليست هناك تعليقات:
إرسال تعليق