تأليف : متولي بصل

يا مصر إيه اللي جرى ؟

شمسك يا أم الدنيا
طالعة منوّرة
بس لسه الضلمة
ساكنة في القلوب !
حتى النفوس هي كمان
متغيّرة
متفرقة
زي الحليب لمّا يروب !
بقى كل واحد فينا
حاجة صغيرة
واحنا اللي علّمنا البشر
يبقوا شعوب
يا مصر !
إيه اللي جرى ؟
خلى حبال الود
ما بينا تدوب
ازاي في غمضة عين
قِدِرت تفرقنا المحن ؟
و اللي اتبنى في سنين
اتهد في لحظة زمن
ما احناش ملايكة يا وطن
بس احنا مش شياطين
ممكن صحيح نغلط
و جايز حتى ننسى
أصلنا .. .. و فصلنا
مش مخلوقين من طين ؟!
لكن أكيد ..
مهما تبعّدنا السكك
و تاخدنا من بعض
.. السنين
راجعين ضروري لبعضنا
مش برضه مصريين ؟!
النيل ببيجري في دمنا
و بيجري في قلوبنا
الحنين !
29 / 8 / 2018 م تأليف : متولي بصل